اپنی ٹیم میں مصنوعی ذہانت کے غیر منظور شدہ استعمال سے کیسے نمٹیں

یہ اردو خلاصہ ہے۔ مکمل رہنمائی، ٹیم کے لیے نمونے کے اصول کے ساتھ، انگریزی میں دستیاب ہے۔

یہ کیا ہے

غیر منظور شدہ استعمال (Shadow AI) کا مطلب ہے عملے کا منظوری کے بغیر یا قواعد سے ہٹ کر سرکاری کام کے لیے مصنوعی ذہانت کے آلات استعمال کرنا، مثلاً فون پر مفت چیٹ بوٹ میں رپورٹ ڈال کر خلاصہ لینا۔ زیادہ تر لوگ لاپروا نہیں بلکہ کام کے بوجھ سے نمٹنے کی کوشش کر رہے ہوتے ہیں۔ خطرہ یہ ہے کہ سرکاری یا ذاتی معلومات کسی کے علم کے بغیر دفتر سے باہر چلی جائیں۔ دیکھیں ڈیٹا کا اخراج (Data leakage)۔

پہچان کیسے کریں

غیر معمولی طور پر تیز اور مختلف انداز کے مسودے، ایسے حوالے جن کا سراغ نہ ملے یا ذاتی فون سے دستاویزات کی تصاویر لینا۔ ان میں سے کوئی بات اکیلے کچھ ثابت نہیں کرتی۔ انہیں الزام نہیں بلکہ بات چیت کا موقع سمجھیں۔

صرف پابندی کیوں ناکام رہتی ہے

متبادل کے بغیر پابندی استعمال کو نظروں سے اوجھل کر دیتی ہے، کیونکہ کام کا بوجھ وہی رہتا ہے۔ پھر آپ رہنمائی کا موقع کھو دیتے ہیں۔ البتہ خفیہ مواد اور شہریوں کا ذاتی ڈیٹا کبھی بھی غیر منظور شدہ آلات میں نہیں جانا چاہیے۔

اس کے بجائے کیا کریں

1. ٹیم سے کھل کر پوچھیں کہ وہ کون سے آلات کس کام کے لیے استعمال کرتے ہیں۔
2. سمجھیں کہ وہ کون سا مسئلہ حل کر رہے ہیں۔
3. آئی ٹی کے ذمہ دار سے معلوم کریں کہ کون سے آلات منظور شدہ ہیں۔
4. محفوظ متبادل فراہم کریں۔
5. ایک صفحے کے سادہ تحریری اصول بنائیں۔
6. عملی تربیت دیں۔
7. غلطی کی اطلاع دینا محفوظ بنائیں۔
8. رہنمائی کا وقتاً فوقتاً جائزہ لیں۔